Carlsen minkabani

Carlsen minkabani er prjónuð úr mjúkri Peruvian Highland Wool frá Filcolana eða úr léttlopa. Eins og alltaf er mjög mikilvægt að skoða vel stærðirnar sem eru í boði áður en þið byrjið að prjóna peysuna. Yfirvíddin skiptir höfuðmáli og ég mæli með að þið skoðið málin frekar en nöfnin á stærðunum. Ermar og bolur eru í lengri kantinum og garnmagnið miðast við það en ég mæli með að fólk máti peysuna jafnóðum og aðlagi lengd á ermum og bol að þeim sem peysan er ætluð. Við erum auðvitað öll alls konar og það er auðvelt að máta peysuna jafnóðum af því hún er prjónuð ofan frá.

Carlsen minkabani er símunstruð peysa sem þýðir að það tekur tíma og einbeitingu að prjóna hana. Það er mikil vinna að prjóna munstur og það er ekkert meira svekkjandi en að leggja margra klukkustunda vinnu í peysu sem síðan passar ekki. Athugið vel prjónfestuna og það er mikilvægt að gera það með munsturprjóni því það er algengt að fólk prjóni annað hvort lausar eða fastar þegar það prjónar munstur. Farið upp um prjónastærð ef þið prjónið fast og öfugt ef þið prjónið laust.